... habb isch mir im Sommer 2014 im Urlaub in Maroggo gekaaft. Des is e Kamelhaarfellhandtasch aus Maroggo, 2014 im Urlaub dort wääscht noch? Mir ware die ganz Zeit do bei Tanga am Meer in der Subberfullinklusionoolach mit allem inklusive. Mir hawwe doch immer de Witz gemacht, dassde monjens schunn de Bakkadie zum Zähbutze gebrocht kriegscht. Wäschde noch? Die Oolach war subber, mer sinn jo die mehrschde Zeit in der Oolach gebliwwe unn hawwen haldemol nix gemacht wie alsemol was getrunke und gesse. Wäschd noch? Blooß äämo waremer drauß mit dere Reisegrubb, die Reisegrubb die wu des Hodel zammegschdellt hot unn mit dere simmer midgange, wäschd noch? Der Reiseführer war subber. Des war so'n klääner, uffgschdumpter, awwer nett und der hott subber daitsch gschproche unn immer so Witzelscher gemacht unn der war als gut druff. Den hab ich richtig gern g'hadde. Unn der uns aach, weil uff eemol, wu mer grad noch uffm weg nach, isch kann mer den Name von dem Ort net merke, Tscheftschautschesko oder so, wu de Reiseleider uff emol g'sagt hat, dass er uns alle echt mag unn das wir annerschter wären als wie die annere Grubbe, die er sunschd so hat, weil die wären immer so langweilisch und mir wären guud druff unn luschdich. Und deswegen hat er gesagt, er dääd uns n G'falle due, den däter net alle oobiete, weil des nämlich nur für Freunde wär unn nix für die breite Masse. Do brauscht garnet grinse wie'n Ochsfrosch, isch nemm a widder ab, am Montag is de Sascha wieder da und dann mach ich mein Pilates unn dann werd des schunn widder. Waads ab. So, wo war ich? Achjo, also hot der uns g'saagt, mir könnten, wenn wir wollten, mit ihm in eine, wie hodder g'saat? "Künstlerkommune", die vun seim Bruder geführt werden würde und die Leut die würden nur ganz edles und echt seltenes Kunstzeug machen für die Kunstmärkte und wir könnten ganz exklusiv emol mit ihm dahingehen und das angucken. Wäschd noch, am End war er ganz uusischer, obber des hätt mache derfe, weil der des jo sunscht net jedem oobiete duut unn ob de Bruder damit iwwerhaupt oiverstanne wär. Hoscht richtig gemerkt, dass des e Sach war, die wu er ned jeden Daach macht. Ging awwer gut, de Bruder war oiverstanne un mir waren 5 Stunne in dere Künstlerkommune. Die hawwe Suppersache g'hatte. Die Leit hawwen gekaaft wie dumm, aber des waren halt aach alles Schnäppscher. Die Teppisch, wann ich net so weit g'hatte hätt zum Hotel hätt ich ja aach äner mitgenumme, so'n Perser, handgeknüpft mit mehr wie verzisch Knote pro, was hadder g'saagt?, Kubikinch odder so uffen jeden Fall merkschte dadran, dass des Künstlertebbisch war. So, unn desdeweesche hab ich mir dann die Kamelhaarfellhanddasch gekaaft, fer umgereschend boß, waddemol, isch glaab, 50 Euro. Wammerse iwwerhaupt irgendwu kriegt. So, do habb isch die Dasch gekauft.
Achjo, Maroggo war schön. Wäässchd noch, de Fronswa? Wie mer de Fronswa kennegelernt hawwe? Mer hawwe doch jeden Moje korz noch Finfe unser Deutschlandhanddischer uff die Liegestühle am Pool gelegt, wäschd noch? Wammer des ned gemacht häddn, häddn uns die blääde Engländer immer die Liegestühl weggenumme. Und de Fronswa, der is jo Belgier gewese, der hat a soi belgische Handtuschflagg uff soin Liegestuhl gelegt. Jeds is des awwer a soo, dass die Belgier ihr Fahn genauso hawwer wie mir mit de Faabe, bloß halt falschrum. Also mir hawwe die Faabe quer, unn die Belgier hawwe die Links. So, unn jetz hot de Fronswa soi Flagg falschrum um die Lieg gelegt und ich hab gedenkt, des wär meine Liege unn uff äämol kummt de Fronswa an und schennt rum, isch dääd uff soinere Lieg liege unn hie und her und du wollschtm schunn uffs Maul schla'e, weil der doch so e halwie Portion war awwer dann hawwemer des mit dere kabutte Flagg rausegfunne und dann zusamme en Madiehni gedrunke. Hot jo nix gekoscht weil war ja alles olinklusiff.
De Fronswa. Der war supper. N Belgier, awwer ähner vund de klore, also n Franzos. Die hawwer jo zwää Ahde vun Belgier, also die französische unn die hollännisch. Die Franzose hässen halt Fronswa unn wie die hollänische häässen wääss isch ned, vielleischd ääfach Ulf, schdeckscht jo ned drin. Also uff jeden Fall hawwermer uns dann ja noch mit dem angefreundet, dem Fronswa, wäschd noch? Der war immer luschdich unn hot immer Witzelscher gemacht iwwer Kinner, unn Määdscher und isch glab, an mir hotter aach s äänd odder annere mol ruff unn nunnergeguckt, der Schlurie! Soin klääner Sohn war aach debai, wääschd noch? Der klää Aff, den hotter doch vun de Marrogganer addobdiert, obwohl der Klää so arg krank war. Mit de Hämmoridde hott er's g'hadde, der Klää. Mit 10 oder 11 Jahre schuns so kaputt und Hämoridde. Der konnt schunn ganimmer richdisch laafe, der Klää, immer so breidbeinig. Isch hab immer g'sagt, der laafd wie James Bond noch seim ledschde Gefecht, so breidbeinig. Unn äämol wolld isch de Fronswa oowends fer noch n Absacker vun soim Zimmer abhole, do hab isch gehört, wie de Fronswa dem Klääne wohl grad die Hämmoridde oingecremt hot oder wassmer da so macht, uff jeden Fall hod der Klääne die ganz Zeit gebrillt unn g'schrie und rumgepienst, do hottermer richdisch leid gedoe, de Fronswa. Ich mään, wammer sisch schunn e Kind holt, dann doch ääns, wu ned so kaputt is, odder? Also nix gegen den Klääne, aber fer der Fronswa war des jo ah ned ääfach. Der Klää is dann ah immer uffm Zimmer geblieben.
Unn die Kamelhaarfelldasch is subber, ne? Die is aus Maroggo. Wadd, isch guck emol... wann wir in Maroggo waren, damit ich kää dumm Zeich verzähl. Des misst uff dere Rechnung noch druffstehe. Die hab isch glaabisch in de Dasch gelosse, damitischse ned verlier. Do isse... waad... do is... der Schnibbel vunn de Dasch... Made in Taiwan... Du, Ulf, wann ware mir dann in Taiwann?
Keine Kommentare:
Kommentar veröffentlichen